NgolweSine uhulumende weZimbabwe uvimbe umkambo wokuthengisa amadiamonds enjiwa emigodini yako Chiadzwa eMarange esogabeni seManicaland, esithi umkambo lo ubungekho emthethweni.
Inkampani emba amadiamond la eye Mbada Diamonds ibifuna ukuthengisa
amadiamonds la emkambo weauction. Uhulumende uphange wavimba umkambo lo ukuthi uqhubeke esithi lokhu yikwephula iziqondiso zenhlanganiso ebona ngokwenjiwa kwamadiamonds emhlabeni jikelele eyeKimberly Process.
Inhlanganiso le ikhangelelwe ukufaka isikhonzi sayo emigodini yako
Marange ukuze sihlolisise umumo endaweni le, lokubona ukuthi umsebenzi
uqhutshwa ngemfanelo.
Inhlanganiso ezilwela ilungelo loluntu zithi amasotsha lamapholisa
aqhubeka esephula ilungelo loluntu koMarange. IKimberly Process ikhuthaze
ukuthi amasotsha lamapholisa kumele asuswe kulindawo.
UNkosazana Anna Moyo ligqwetha elilwela ilungelo loluntu. UNkosazana Moyo utshele uBrenda Moyo weStudio7 ukuthi inhlanganiso yeKimberly Process ikhanya ingelamandla okuthi uhulumende weZimbabwe alandele iziqondiso zayo.
