amalinks wokungena

Breaking News

Uhulumende WeZimbabwe Kumele Amise Udlakela - South Africa


Kusehlakalo esiveza ukuthukuthela okukhona kuhulumende weSouth Africa ngokusolwa kukaMongameli Jacob Zuma nguMongameli Mugabe, eleSouth Africa selethule umbiko lisola okwenzakala eZimbabwe lisithi udlakela olukhona kaluphele ngokuphangisa.

Embikweni awethule ngoLwesibili, umphathintambo obona ngobudlelwano beSouth Africa lamanye amazwe uNkosikazi Maite Nkoana-Mashabane uthe ilizwe lakhe lima ngezinqumo ezithethwe yiSadc Troika ngeviki edluleyo ezokuthi kumele uhulumende weZimbabwe eqede udlakela njalo afeze konke okulokhe kungakafezwa phansi kweGPA.

UZuma, ongumlamulankunzi kudaba lweZimbabwe laye ubekhona emhlanganweni weTroika lo oqhutshelwe kweleZambia. UMugabe usole uZuma ngoLwesihlanu esithi kamelanga atshele iZimbabwe okokwenza.

Kodwa ekhuluma lentathelizindaba uNkosazana Nkoana-Mashabane uthe eleSouth Africa alibuyeli muva edabeni lokuthi iZimbabwe kumele iqede udlakela, inkulumo elokuxabana phakathi njalo kubunjwe isisekelo sombuso esitsha andubana kwenziwe ukhetho.

UZuma ubikwa edane kakhulu ngokusolwa nguMugabe kanye lokuhlambazwa ngamaphepha kahulumende asekela iZanu PF afana leSunday Mail.

Kunjalo nje, abamela amabandla akuhulumende womanyano kunkulumo zokuxazulula ingxaki ezikhona sebeqalisile ukuhlela umhlahlandlela wokhetho uMugabe athi ufuna lwenziwe lonyaka.

Emazwini awethule ngempelaviki, uMugabe wethese iMDC umlandu wokusenga ezimithiyo ngokuthi kulodlakela, esithi yenza lokhu ngoba ibalekela ukhetho. Kodwa uthe lolukhetho luzakwenziwa lonyaka loba sokutheni.

Umsekeli wesikhulumeli seMDC ekhokhelwa nguMnu Morgan Tsvangirai, uNkosazana Thabitha Khumalo uthe uMugabe uyaziphuphela nje kuphela nxa ecabanga ukuba ukhetho lungenziwa lonyaka khona kusakunengi okungakalungisiswa.

Amazwi kaMaKhumalo agcizelelwe yisikhulumeli seMDC ekhokhelwa nguMnu Welshman Ncube, uMnu Nhlanhla Dube.

XS
SM
MD
LG