Kuyonale iviki inhlanganiso ebona ngezamalungelo abantu emhlabeni jikelele eye Human Rights Watch yethule umbiko oveza ukwehluleka kukahulumende womanyano ukuguqula ezokwethulwa kwemibiko elizweni.
UHuman Rights Watch ithi kukhanya kulokuncindezelwa kwalabo abafuna ukuvula imisakazo lamaphephandaba, lentathelizindaba ezifuna ukusebenza zikhululekile. Selokhe kwabunjwa uhulumende womanyano akula maphephandaba amatsha asethe aphiwa imvumo yokusebenza elizweni kanye lemisakazo ezimeleyo.
Abebandla le MDC ekhokhelwa nguMnu Morgan Tsvangirai isilogwalondaba olwazisa uzulu ngokwenzakalayo ebandleni leli oluthiwa Changing times.
AbeZANU PF labo sebevuselele elabo elithiwa the Peoples Voice basungula amanye amabili aphiwa izakhamuzi zemaphandleni.
Ukuhlaziya udaba lokwehluleka kukahulumende womanyano ukukhulula ukwethulwa kwezindaba elizweni, uBrenda Moyo weStudio 7 uxhume ingcwethi ecubungula ezombusazwe uMnumzana Zenzo Nkomo endawonye lomqondisi wenhlanganiso ye Media Institute of Southern Africa uMnumzana Nhlanhla Ngwenya. Bobabili bayavumelana ukuthi ibandla leZANU PF yilo elivimba inguquko ezintweni ezinengi elizweni.
