Intathelizindaba, uMnu. Itayi Dzamara labanye bakhe ababalisa Jerry Mugweni, Tafadzwa Charumbira lababili esingatholanga izibongo zabo, u Bothwel lo Allan abalohlelo lokutshengisela nsukuzonke eHarare bathunjiwe ngabantu abangaziwayo batshaywa kabahlungu.
Abane laba basiwe esibhedlela se Avenues Clinic lapho ababikwa beselatshwa amanxeba esabekayo emzimbeni lenyaweni zabo okokuthi kabenelisi ukuhamba. Babikwa behanjiswe emahofisini eZanu PF eHarare lapho abatshaywe khona.
Omunye wabo ubikwa edabuke ekhanda ngemva kokutshaywa ngensimbi. Babikwa betshiywe phandle kwenkamba yeHarare Central lapho abathethwe ngabanye babo babasa esibhedlela.
UDzamara labanye bakhe sebelamaviki amathathu betshengisela besithi uMugabe kumele asuke esikhundleni kwenziwe ukhetho ngoba usehluleke ukubusa.
UChris Gande weStudio Seven uxoxe lomunye wabatshengiselayo, uMnu. Charles Nyoni ochasisa ngokwenzakele lapho abanye bakhe bethunjwa.