Isiphathamandla se Women of Zimbabwe Arize, i-WOZA, uNkosikazi Jenni Williams uthi amalungelo oluntu lokhu esephulwa okwesabekayo eZimbabwe, ikakhulu eminyakeni engamatshumi amathathu edluleyo. Uthi njalo amalunga enhlanganiso yakhe lokhu ebotshwa mahlayana nxa etshengisela elwela amalungelo awo.
UNkosikazi Williams ubikwa ethule la amazwi e Carlifornia khonapha eMelika, emhlanganweni owe Sanela Diana Jenkins International Human Rights Speaker Series ekolitshini le Stanford University.
Kusenjalo, uNkosazana Magodonga Mahlangu, esinye seziphathamandla ze WOZA, utshele uSithandekile Mhlanga we Studio 7 ukuthi inhlanganiso yakhe iqoqa umhlangano lohulumende ngenjongo yokuhlaziya udaba lokuhlukuluzwa kwabantu elizweni ngamapholisa.