amalinks wokungena

UJeys Wethula Indlikizane Yedlalade

  • Ntungamili Nkomo

KuWoza Friday kuliviki silomhlabeleli olodumo uJeys Marabini, yena osanda kwethula idlalade leAfro-jazz elivutha okwamalangabi omlilo wendle.

Idlalade leli lilesihloko esithi Jeys@40, kwazise uMarabini seleminyaka yokuzalwa engamatshumi amane, 40 years.

Lincindezelwe ngobuciko lobunono obuphezulu njalo lixubanisa indikimba lendimi ezitshiyeneyo.

Kungoma ethi Ukufa, uJeys ukhala ngabazali bakhe ababhubhele engozini yemota nyakenye. Lapha ubambisane lomngane wakhe, ongumhlabeleli kweleDRC, uPrince Kavulamini Kabwiti.

Enye ingoma yakhe athi ihlanyisa abanengi ngethi Yamitha Kanjani? Ukhuza umhlola ke lapha uJeys ngentombazana engakaphuhli lokuphuhla kodwa nansi silesisu.

Kambe kungaba yibutshapha babantwana besimanjemanje kumbe lintombazana idlwenguliwe yizigilamkhuba, abantu abangelambeko abakhulela komhlambi uzelusile?

Yebo idlwenguliwe lintombazana, njalo umhlola yikuthi ibanjwe nguyise, kutsho umhlabeleleni.

Njengomhlabeleli olendumela emazweni amanengi, agoqela akhuluma isiSwahili, uMarabini wethule enye ethi Muge Yangu Wa-ro, okutsho ukuthi Sthandwa Sami Senhliziyo.

Kulenje njalo ingoma eyimpicabadala ethi Ukhulu Uyaluma, yona athi lapho enza khona amakhonsati abalandeli bakhe bahle bacele ukuthi avule ngayo.

UJeys, yena ogama lakhe lokuzalwa nguMajahawodwa Ndlovu, uncindezele idlalede leli kweleSouth Africa njalo ngelesithupha.

Amanye amadlalade akhe abalisa elithi Emarabini, Thuthukani Ngothando, Sounds of Today and Tomorrow, One Time lelithi Izenzo elanyakenye.

Kodwa wonke la asala phansi kudlalade lakhe leli, lona elixubanisa indikimba ezigoqela eyothando, usizi, amasiko kanye lokugugudeka kobuntu.

Okuhambelana lalokhu

XS
SM
MD
LG