Inhlanganiso elwela amalungelo ezizalwane zeZimbabwe ezise Bhilithani eye Zimbabwe Diaspora Focus Group ithi ilokhu isebenza gadalala lohulumende wakulelolizwe ukuthi abadinga ubuphepheli bengabuyiselwa emuva ngoba umumo wezombusazwe ulokhu ungamanga kuhle elizweni.
Uhulumende weBhilithani usanda ukunquma ukuthi izizalwane zeZimbabwe zibuyiselwe emuva ngoba kungela bufakazi bokuthi zizahlukuluzwa eZimbabwe sekulokhu kwabunjwayo uhulumende womanyano, ikakhulu ko Bulawayo le Matabeleland.
Inhlanganiso ye Diaspora Focus Group, egoqela amalunga enhlanganiso ezizimeleyo lamabandla ezombusazwe ithi ilokhu iqoqa ubufakazi ezabuvezela uhulumende weBhilithani ukuthi umumo welizwe awumanga kuhle.
UMnu. Zenzo Ncube, isiphathamandla sebandla le ZAPU njalo elilunga lale inhlanganiso utshele uSithandekile Mhlanga we Studio 7 ukuthi lanxa isinqumo sikahulumende walelolizwe silokhu simi, inhlanganiso yakhe ilakho ukumguqula ingqondo.