Amacele womabili ebandla le MDC athi awavumelani lebandla le ZANU PF ukuthi ukhetho lwenziwe lonyaka ngoba kukunengi okungakalungiswa elizweni okungenza ukuthi ukhetho lube ngolukhululekileyo.
UMnu. Rugare Gumbo, isikhulumi sebandla le ZANU PF, utshele intathelizindaba ukuthi ukhetho luzaqhutshwa lonyaka kungalotshwa isisekelo sombuso esitsha.
UGumbo uphinde wathi icele le MDC elikhokhelwa nguMnu. Morgan Tsvangirai lingaphikisa isinqumo salo, ibandla le ZANU PF lizaqhubeka ngokhetho lelinye icele le MDC elikhokhelwa nguMnu.Welshman Ncube.
UMnu. Douglas Mwonzora, isikhulumi secele le MDC elikhokhelwa nguMnu. Morgan Tsvangirai utshele iStudio 7 ukuthi ibandla lakhe alivumi ukuthi ukhetho luqhutshwe lonyaka kungakalungiswa okuhluphayo kuhulumende womanyano.
UMnu. Nhlanhla Dube, isikhulumi secele elikhokhelwa nguMnu. Ncube utshele uSithandekile Mhlanga weStudio 7 ukuthi ibandla le ZANU PF alilalungelo lokuthi ukhetho luzaqhutshwa nini lingavumelananga lamanye amabandla akuhulumende womanyano.
Ukuhlaziya loludaba, uNtungamili Nkomo weStudio 7 uxoxe lengcwethi ezicubungula ezombusazwe uMnu. Effie Dlela Ncube loMnu George Mkhwanazi.