amalinks wokungena

Breaking News

Ukubotshwa Kwamalunga eMDC Kuqhubekela Phambili Elizweni


Firayim Minista Morgan Tsvangirai

Abasekeli bebandla leMDC elikhokhelwa nguMnu. Morgan Tsvangirai abalitshumi lanhlanu ababotshwe koBulawayo ngoLwesihlanu abazakali ukuthi basiwe ngaphi. Ibandla leli selidinge inkamba zonke zamapholisa kodwa ababotshiweyo laba, abagoqela abantwana abaleminyaka elitshumi lanhlanu, ababonwa muntu.

Lokhu kwenzakala ukubotshwa kwamalunga ebandla leli kuqhubekela phambili. Umtshayeli wemota kamsekeli wenhloko kahulumende, uNkosazana Thokozani Khuphe, uMnu. Witness Dube obotshwe ngeviki edluleyo esetheswa icala lokwala ukusayina ugwalo lokutshengisela ukusola izijeziso zenotho lokhu esesitokisini. Kuthi umphathintambo wezenzakala elizweni, uNkosikazi Theresa Makone ocatshe ngoLwesihlanu lokhu engazivezanga kulandela imbiko ethi udingwa ngamapholisa ngamehlo abomvu.

EKadoma elinye ilunga leMDC, uMnu. Gabriel Masize ubotshwe ngoMgqibelo engetheswanga cala. Iphephandaba le Newsday lithi umkhokheli wecele leMDC leli, uMnu. Tsvangirai ngokwakhe ulakho ukubotshwa kulandela ukwethulwa kwenhlolisiso ethi wephula na umthetho ngembiko eyethulwe liphephandaba lebulenjini, iWikileaks. Igqwetha likahulumende, uMnu. Johannes Tomana ubikwa eselogwalo olwethulwe ngamagqwetha acubungula loludaba.

Kuthi owayengumlawuli wedale lephalamende, uMnu. Lovemore Moyo laye ubikwa engabotshwa ngasiphi isikhathi esetheswa icala lokweyisa umthethwandaba. UChris Gande weStudio 7 uxoxe lomsekeli wesikhulumeli seMDC ekhokhelwa nguMnu. Tsvangirai, uNkosazana Thabitha Khumalo ukuze sizwe okunengi ngaloludaba.

XS
SM
MD
LG