amalinks wokungena

Breaking News

Ukudonselana KweZanu PF LeMDC Kubangela Ukumiswa Kohlelo Lokulotshwa Kwesisekelo


Uhlelo lokulotshwa kwesisekelo sombuso esitsha solumisiwe njalo kulandela ukudonselana okukhulu osokuqhamuke phakathi kweZanu PF lamacele womabili eMDC.

Ukudonselana lokhu kuphezu kokuthi imibono eyathathwa kuzulu kumele ihluzwe njani ukuze ingene kusisekelo esitsha.

IZanu PF ithi ukuze umbono othile ungene kusisekelo sombuso, kumele kukhangelwe inani lemihlangano lapho elalikhanya lilosekelo olunengi khona.

Amacele womabili eMDC ayakuphikisa lokhu esithi iZanu PF itsho njalo ngoba ikwazi ukubana yenza imihlangano eminengi emaphandleni lapho eyayibamba khona uzulu ngamandla ukuthi asekelo imbono yayo.

Omele iZanu PF kuCopac uMnu Paul Mangwana uthe inkinga yikubana iMDC ifuna ukufaka imbono engathakazelelwa nguzulu efana lokuthi izitabane zibe lamalungelo phansi kwesisekelo esitsha.

IManagement Committee yiyo esizakhangela udaba lolu andubana kuqhutshekelwe phambili. Ingehluleka ukuluxazulula, soluzahlafunwa ngabakhokheli bamabandla akuhulumende.

Omunye wabagcinisihlalo beCopac njalo engowe MDC ekhokhelwa nguMnu Welshman Ncube, uMnu Edward Mkhosi utshele uNtungamil Nkomo weStudio 7 ukuthi yikuganga okukhulu iZanu PF esifuna ukukwenza.

Okuhambelana lalokhu

‚Äč
XS
SM
MD
LG