Inhlanganiso ekhankasela ukwenqatshelwa kwezimpi emhlabeni jikelele eye International Crisis Group ithi ukufuthelana kuhulumende womanyano eZimbabwe kundlondlobale kwafika ezingeni elibi kakhulu ngenyanga edluleyo.
Egwalweni elwethule kuliviki, inhlanganiso le ithe ukungafezwa kwesivumelwano seGlobal Political Agreement phakathi kweMDC leZanu PF yikho okubangela ukungezwani okukhona.
I ICG ixwayise ukuba ukufuthelana lokhu kuqhele kwafika kubanga lokuthi uhulumende uselakho ukubhidlika konakale okunengi.
Inhloko kahulumende uMnu Morgan Tsvangirai wazise ngenyanga edluleyo ukuthi iMDC yakhe ayisoze yamukele iziphathamandla ezikhethwe ngudlu nguMongameli Mugabe ezigoqela osibalukhulu bezabelo, abehluli bedale leHigh Court labameli beZimbabwe kwamanye amazwe.
Kodwa abe Zanu PF bathi uMugabe wenze lokhu ngoba kulilungelo lakhe aliphiwa yisisekelo sombuso.
Ukufuthelana kukhanya sokuqhela njalo kuhulumende ngemva kokuba iziphathamandla zeZanu PF zethule imibiko yokuba lanxa ibandla leli lingaze linqotshwe kukhetho alisoze lisuke esihlalweni.
Ingcwethi ecubungula ezombusazwe uMnu Bhekilizwe Ndlovu utshele uNtungamili Nkomo weStudio 7 ukuthi ngempela ukufuthelana okukhona kufaka uhulumende womanyano engozini enkulu.
