Abenhlanganiso yamagqwetha alwela ilungelo loluntu, eye Zimbabwe Lawyers For Human Rights, bathi bazakusa udaba lokukhwezwa kwembadalo yemithelo emigwaqweni, ama Toll Gates emthethwandaba.
Lokhu kulandela imbiko ethi abezimota ezincane abakade bebhadala idola elilodwa-$1 egedini linye sebezabhadala amadola amabili-$2. Kuthi amakhombi lamabhasi amancane asezabhadala amadola amathathu-$3 isuka kumadola amabili.
Amabhasi kade ebhadaliswa amadola amathathu asezahlawula amane-$4. Abanengi bakhala ngokuthi ama toll gates la asemanengi kakhulu ngoba ukusuka koBulawayo umtshayeli esiya eHarare ubhadala imali engafika phose amadola angamatshumi amabili.
Okunye njalo okukhathaza uzulu yikuthi akukhanyi ukuthi imali etholwa kuma toll gates le kanti vele iyangaphi.
UChris Gande weStudio 7 uxoxe lomphathintambo wezokuthwala, uMnu. Obert Mpofu othi abakhononayo kabazi ukuthi kuyini okwenzakalayo.
