amalinks wokungena

Breaking News

Ukuphikisana Kuyaqhubeka Ngodaba LweZimbabwe Emhlanganweni WeKimberly Process EIsrael


Kukhanya kulokuphikisana okukhulu emhlanganweni weKimberly Process owenzelwa eJerusalem kwele israel ngodaba lweZimbabwe. Udaba olusegudwini ngoluthi iZimbabwe kumele ikhululwe na izithengisele amadayimana akoChiadzwa ingeluswa zinhlanganiso zomhlaba.

EleZimbabwe lithi seligcwalisisile izinqumo zonke zenhlanganiso yeKimberly Process ngakhoke alisadingi kweluswa. Kodwa abenhlanganiso ezilwela ilungelo loluntu ezigoqela i Human Rights Watch zithi kulokwephulwa kwelungelo loluntu emigodini yeChiadzwa ngakhoke iZimbabwe ayivunyelwe ukuthengisa amadayimana alo kuphela nxa ikhangelwe yiKimberly Process njengalokho okwenzakale kumikambo emibili eyenziwe kweleZimbabwe ngenyanga kaNcwabakazi langenyanga kaMpandula.

EleZimbabwe likhanya lisekelwa ngamazwe awezwekazi leAfrica labangane balo ezwekazi leAsia.

Isiphathamandla senhlanganiso yeEuropean Union uMnumzana Stephane Chardon olilunga leKimberly Process uthi kulobufakazi obuthize obuveza ukuthi eleZimbabwe selilandele okunye obekunqunywe yiKimberly Process.

UBrenda Moyo weStudio 7 ukhulume lengcwethi ecubungula ezombusazwe uMnumzana Walter Nsununguli Mbongolwane othi iKimberly Process iyabe iphambanise kakhulu ingavumela iZimbabwe ukuthi ithengise amadayimani ayo ingasakhangelwanga, ngoba inzuzo yamadayimana la ilakho ukungena ezikhwameni zabantu abangayisibo.

‚Äč
XS
SM
MD
LG