amalinks wokungena

Breaking News

Ukuhluthunwa Kwempahla YeleSwitzerland Sokungumthetho - Charamba


Isikhulumeli sikaMongameli Mugabe, uMnu George Charamba uthi sokungumthetho ukuthi iZimbabwe ithathe impahla yeSwitzerland eselizweni egoqela amankampani njengendlela yokuphindisela phezu kokuncitshwa ivisa kukaNkosikazi Grace Mugabe lequla ebelimele liye kweleSwitzerland loMugabe ngeviki edluleyo.

UMugabe uthe ucunuke kakhulu ngokuncitshwa kwequla lakhe amavisa, okubangele ukuba emise uhambo lwakhe lokuyaphatheka emhlanganweni obohlaziya okuphathelane lokujanjiswa kwemibiko.

Ufunge esithi eleZimbabwe lizathatha amanyathelo okuphindisela phezu kwesehlakalo lesi.

UMnu Charamba utshele iphephandaba leNewsDay ngoLwesibili ukuthi amazwi kaMugabe asengumthetho njalo ingatsha zikahulumende ezimbili ezibalisa olweForeign Affairs lolubona ngokuthuthukiswa kwabensundu kwezenotho yizo esezimele zithathe amanyathelo.

Impahla yakweleSwitzerland elakho ukuthathwa igoqela inkampani elungisa uchago iNestle.

Lanxa umabhalane weForeign Affairs uMnu Joey Bimha ebethembisile ukukhuluma lathi ngaloludaba, ubengasadobhi ucingo lwakhe.

Umphathintambo obona ngezabatsha kanye lokuthuthukiswa kwabensundu kwezenotho uMnu Savior Kasukuwere laye wenze okufanayo.

Kodwa amacele womabili eMDC akulandule ukuba imbiko kaMugabe isingumthetho esithi udaba lolu aluzange lukhulunywe ngalo edale leCabinet.

Umsekeli wesikhulumeli seMDC ekhokhelwa nguMnu Morgan Tsvangirai uNkosazana Thabitha Khumalo uthe ayiqondanga imbiko kaCharamba.

XS
SM
MD
LG