Inhlanganiso ebona ngokuthengiswa kwamatshe aligugu awamadayimana eye Kimberley Process ithe gwaqa eKinshasa kwele Democratic Republic of Congo lapho ekhangelelwe ukuhlaziya udaba lokuthi amadayimana eZimbabwe embiwa eMarange engathengiswa kumbe hatshi.
Ekuqaleni kwawonalo umnyaka, umgcinisihlalo walinhlanganiso uMnu. Mathieu Yamba uthe amadayimana eZimbabwe embiwa eMarange angathengiswa engekho ngaphansi kwelihlo le Kimberly Process kodwa amanye amalunga ale inhlanganiso kanye lenhlanganiso ezimela ilungelo loluntu ziyakwala lokhu zisithi eleZimbabwe kufanele liqale linanze amalungelo oluntu.
UMnu. Gift Chimanikire, umsekeli kamphathintambo obona ngogatsha lokwembiwa kwemigodi utshele iStudio 7 ukuthi uhulumende uthembe ukuvunyelwa ukuthengisa amadayimana la ngoba inzuzo izathuthukisa umnotho welizwe.
UMnu. Effie Dlela-Ncube, ingcwethi ecubungula ezombusazwe utshele uSithandekile Mhlanga we Studio 7 ukuthi eleZimbabwe lingavunyelwa ukuthengisa amadayimana nxa selinanza ilungelo loluntu njalo kubonakala ukuthi inzuzo izasetshenziswa ukuthuthukisa umnotho welizwe.