Umthethwandaba waphezulu eHarare uqalisile njalo ngoMvulo ukuthetha icala eletheswa umphathintambo wogatsha olubona ngamandla kagetsi uMnu. Elton Mangoma elokuwoda amafutha ephethulo engalandelanga imithetho yelizwe. Umfakazi omqoka ekuthethweni kwalelicala, uMnu. Justin Mupamhanga ongumabhalani omkhulu kulolu gatsha uphe ubufakazi obuphikisana labuphe ngenyanga edluleyo.
Ngakwelinye icele, umthethwandaba kamantshi ko Bulawayo unqume ngoMvulo ukuthi omunye weziphathamandla ze Mthwakazi Liberation Front, uMnu. Paul Siwela aqhubeke evalelwe entolongweni kuze kuthethwe icala lakhe elokuzama ukugenqula uhulumende.
Umantshi uMnu. Ndumo Masuku ubikwa ethe usedinge imvumo yokuthi icala eletheswa uSiwela, obotshwe kunyanga ezimbili ezedluleyo lithethwe ngokutshetsha.
USiwela yena uzamiswa njalo phambili komthethwandaba njengenjayelo kumaviki amabili alandelayo ukuze azwe ukuthi isinqumo lesi asikaguqulwa na. Kubikwa intathelizindaba yethu yeStudio 7 uSithandekile Mhlanga.