Umabhalane wedale lephalamende, uMnu. Austin Zvoma uthi icele leMDC elikhokhelwa nguMnu. Welshaman Ncube lingaba lephula umthetho ngokwazisa ilizwe ukuthi amalunga alo azavotela uMnu. Lovemore moyo owecele leMDC elikhokhelwa nguMnu. Morgan Tsvangirai.
Lokhu kulandela ukunqoba kukaMoyo weMDC-T othole amavoti edlula alikhulu-105 encintisana loMnu. Simon Khaya Moyo owe Zanu PF yena othole phose alikhulu-93 kukhetho lokudinga usomlo wedale lephalamende.
UZvoma uthi usahlolisisa loludaba ukuze abone ukuthi lungabuyela na emthethwandaba weSupreme Court onqume ukususwa kuka Moyo esikhundleni ngoba engakhethwanga kuhle ekuqaleni. Kodwa igqwetha elicubungula ezomthetho, uMnu. Kucaca Phulu utshele iStudio 7 ukuthi uZvoma usetshengise ukuthi kawazi umsebenzi njalo usekela ibandla leZanu PF.