Owayengunobhala jikelele webandla leZapu, wazokuba njalo ngusibalukhulu wesabelo seMatabeleland North uMnu Welshman Mabhena, yena obhubhe ngoLwesibili senikwe inhlonipho yokuba liqhawe lesizwe.
UMabhena unikezwe linhlonipho lidale leZanu PF Politburo ngoLwesithathu.
Inyathelo leli limangalise abanengi ngoba uMabhena ubengumuntu obesaziwa ngokusola umbuso kaMongameli Robert Mugabe. UMabhena wasuka esikhundleni sokuba ngusibalukhulu ngemva ngokuxotshwa nguMugabe.
Ukunikezwa kukaMabhena inhlonipho yeqhawe lesizwe, kutsho ukubana kumele ayebekwa emalibeni eNational Heroes Acre.
Kodwa abemuli yakhe bathi umuyi watshiya exwayise ukuthi engaze abekwa eHeroes Acre alubana enikezwe leyo nhlonipho.
Umnewabo kamuyi, uMnu Norman Mabhena uthi bahlangane leziphathamandla zeZanu PF ngoLwesibili bazazisa ngesixwayiso sikaMabhena esokuthi engaze angcwatshwa eHeroes Acre.
AbeZanu PF bona bathi bayasihlonipha isifiso sikamuyi njalo bayasamukela. UMabhena uzabekwa ngoMgqibelo emathuneni eLady Stanley koBulawayo.
Ukuhlaziya ukunikezwa kukamuyi inhlonipho yeqhawe lesizwe lokulaya kwakhe esaphila ukuthi engaze abekwa e Heroes Acre, sixhume ingcwethi ecubungula ezombusazwe uMnu Qhubani Moyo.
