Obe dume ngokufundisa intathelizindaba njalo elilunga leBoard yama Trustees eye MISA-Zimbabwe uMnu. Timothy Mutero Nyahunzvi akasekho. UNyahunzvi obhubhe ngoMvulo ngemva kokulwisana lomkhuhlane wemvukuzane, ubeseleminyaka engamatshumi ayisikhombisa lanye - 71.
Intathelizindaba zitshengise ukudana ngemfa ka Nyahunzvi obengumlobi njalo wengwalo zokufundela ukuba yintathelizindaba. Ilanga lokubekwa kwakhe alikaziswa kodwa abantu babuthene emzini wakhe eMufakose eHarare.
uChris Gande weStudio 7 uxoxe lomgcinisihlalo we MISA - Zimbabwe, uMnu. Loughty Dube othi imfa kaNyahunzvi idanise intathelizindaba ezinengi kakhulu, inengi lazo elafundiswa nguye lapho engumbalisi eHarare Polytechnic.