Umeli weZimbabwe kweleAustralia, olilunga leMDC ekhokhelwa nguMnu Morgan Tsvangirai, uNkosazana Jacqueline Zwambila sebiziwe ekhaya ukuba ezochasisa ngembiko yokuthi uke wanqunulela abesilisa asebenza labo esigodlweni seZimbabwe khonale kweleAustralia kumalanga asanda kwedlula.
Imbiko ephuma kumaphephandaba atshiyeneyo ithi uNkosazana Zwambila unqunulele abesilisa laba njengendlela yokukhonona lokuthukuthela ebethesa umlandu wokunikeza intathelizindaba zephephandaba leHerald indaba eziphathelane lesigodlo lesi.
IHerald ibike ngoLwesibili ukuba uZwambila ufike eHarare kumalanga edluleyo ngemva kokuba ebizwe ngumphathintambo obona ngobudlelwano beZimbabwe lamanye amazwe womhlaba uMnu Simbarashe Mbengegwi ukuba azechasisa ngehlazo leli, eselitshiye inkokheli yeMDC kaTsvangirai ilamahloni ingazi lokuthi ingene kuwuphi umlindi.
Iziphathamandla zalelibandla zalile ukukhuluma ngodaba lolu. AbeZanu PF bona bathi uNkosazana Zwambila kumele axotshwe umsebenzi ngoba eyangise uzulu weZimbabwe ngokunqunula emphakathini.
