EleZimbabwe limanyane lamanye amazwe omhlaba ekunanzeni ilanga lokukhuthaza imfundiso yokuvinjwa kokumemetheka kwengculaza, ele World Aids day elinanzwa mhlaka 1 Mpalakazi minyaka yonke.
Lelilanga labekwa yinhlanganiso ye United Nations Programme on HIV and AIDS, iUNAIDS ukuze amazwe omhlaba engezelele ulwazi kuzulu jikelele mayelana legcikwane le HIV lomkhuhlane weAIDS, ukudinga imali yokuphathisa asebehlaselwe ngumkhuhlane lo, lokupha uzulu imfundiso eqinileyo mayelana ngokuzivikela.
Isihloko salonyaka sithi “Universal Access and Human Rights”. Lonyaka inhlanganiso ezilwela ilungelo lalabo asebephila legcikwane ezigoqela National Aids Council zimanyene logatsha lwezempilakahle, lenhlanganiso eziphathisa ngoncedo zinanze lelilanga edolobheni leVictoria Falls.
Inhlanganiso ye Zimbabwe Lawyers for Human Righs yethule umbiko wokunanza lelilanga ikhuthaza uhulumende ukuthi ahloniphe asebephila legcikwane ngokubatholisa imithi yama anti-retroviral drugs.
Ibandla leMDC lalo likhuthaze uhulumende womanyano ukuthi azame ukuvimba ukumemetheka komkhuhlane lo ngokutholisa uzulu imfundiso kanye lemithi eyengezelela impilo kulabo asebephila legcikwane.
UDokotela Samukeliso Dube utshele uBrenda Moyo weStudio 7 ukuthi kweleZimbabwe uhlupho olukhulu olukhona ngolokuthi abantu abanengi lokhe bengafuni kuyahlolwa igazi, esipha inkuthazo yokuthi lowo lalowo kumele azi isimo sakhe.
Kunjalo nje basakhulayo base Harare bamanyene labamazwe omhlaba ekunanzeni ilanga leli, ngokudweba lokutshengisa imifanekiso emayelana lesifo lesi.
