Umanyano we African Union kawuzange uphathe udaba lweZimbabwe lanxa uMongameli Mugabe ebikwa ezame ngazo indlela ukudinga usekelo lwe AU ukuthi enze ukhetho eZimbabwe ngesiphangiphangi. UMugabe ufuna kwenziwe ukhetho lonyaka lanxa kungakabi lesisekelo sombuso esitsha.
Umhlangano we AU obusenzelwe kwele Ethiopia uphele kungela othole amavoti eneleyo okuthatha isikhundla sikamgcinisihlalo, phakathi kukaMnu. Jean Ping loNkosazana Dlamini-Zuma wakwele South Africa. Lokhu kuzakwamukelwa libandla leZanu PF ngoba selike latshengisa ukuthi uDlamini – Zuma kalifuni ukuthi aphatheke kudaba lweZimbabwe. Isikhulumi somanyano wenhlanganiso ezizimeleyo, iCrisis in Zimbabwe Coalition, uMnu. Thabani Nyoni utshele iStudio 7 ukuthi lanxa udaba lweZimbabwe lungaphathwanga kabanzi uMongameli wakwele South Africa, uMnu. Jacob Zuma ucathekele lumhlangano isimo seZimbabwe lumhlangano.
Kunjalo nje, ingcwethi ecubungula ezombusazwe, uMnu. Rejoice Ngwenya utshele iStudio 7 ukuthi isinqumo esithethwe yinhlanganiso ye au sokungaphathi udaba lweZimbabwe sizemukelwa libandla leMDC ngoba imizamo kaMongameli Mugabe yokuthi kube lokhetho ngesiphangiphangi yehlule.