EleZimbabwe lithi ukuncitshwa kwalo imvumo yokuthengisa amadayimana akoMarange lizimele lodwa akutsho lutho ngoba lizaqala masinyane ukuthengisa amadayimana alo afika 4,5 million carats.
Inhlanganiso ye Kimberley Process Certification Scheme yethule lesisinqumo emhlanganweni weIsrael izolo ngemva kokubana amazwe agoqela eleMelika, Canada le Australia abikwa ephikise kanzima, esala ukuthi eleZimbabwe linikwe imvumo.
Umgcinisihlalo weKimberly Process uMnumzana Boaz Hirsch uthembise ukuthi inkulumo zizaqhubeka kuze kube lokuvumelana phakathi kwamazwe onke aphikisanayo ngodaba lweZimbabwe. Lumhlangnao ubikwa ugqitshwe namhla.
UBrenda Moyo weStudio 7 ukhulume lesikhulumeli sebandla leMDC elikhokhelwa nguMnumzana Arthur Mutambara, uMnumzana Nhlanhla Dube ochasisa ukuthi ibandla lakhe lamukele njani lesisinqumo seKimberley Process.
Kunjalo nje ingcwethi ecubungula ezombusazwe uMnumzana Walter Nsununguli Mbongolwane uthi eleZimbabwe lilakho ukuthola inzuzo ephansi uma lingaqhubeka lithengisa amadayimana alo ngaphandle kwenhlanganiso yeKimberley Process.
