OlweSithathu kube kumele libe lilanga lokucina lomhlangano wenhlanganiso yeKimberly Process owenzelwa eTel Aviv kwele Israel, njalo ngesikhathi lolu daba lusiya ebulenjini umhlangano lo ubungakagqitshwa, ngakhoke bekungakacaci ukuthi uphume laziphi izinqumo.
Umhlangano weKimberly Process lo obuhlaziya njalo udaba lweZimbabwe, ubukhangelelwe ukuthatha isinqumo sokuthi eleZimbabwe livunyelwe na ukuthengisa amadayimani alo akoChiadzwa emkambo yomhlaba kumbe hatshi.
Ekusungulweni komhlangano lo ngoMvulo iKimberly Process ibikhuthaze uhulumende weZimbabwe ukuthi nxa efuna ukunikwa imvumo yokuthengisa amadayimana alo kumele ikhulule uMnumzana Farai Maguwu umqondisi wenhlanganiso ye Center for Research and Development obotshelwe ukwethula umbiko ngokuhlukuluzwa kwabantu emigodini yeMarange, ayinikeze uMnumzana Abbey Chikane oweKimberly Process.
Ngesikhathi kuqhutshwa umhlangano lo inhlanganiso ezilwela ilungelo loluntu ziqhubeke zikhankasela ukuthi eleZimbabwe lincitshwe limvumo yokuthengisa amadayimani alo. Eyinye yalezinhlanganiso ngethiwa The Rapaport group ekhuthaza indlela ezicacileyo zokuthengiswa kwamadayimani. Umgcinisihlalo walinhlanganiso uMnumzana Martin Rapaport ubekhankasela ukuthi amadaimond athiwa alegazi angathengiselwa amazwe omhlaba, ngokukhalala ukudla okwamalanga amathathu omhlangano lo.
UBrenda Moyo weStudio 7 ukhulume loMnumzana Rejoice Ngwenya ingcwethi kwezenotho othi eleZimbabwe lilakho ukuthuthukisa inotho yalo nxa linganikwa imvumo yokuthengisa amadayimani ako Chiadzwa.
