Umkhokheli weleIran uAyatollah Ali Khamenei sencome uMongameli Robert Mugabe esithi ungumkhokheli olesibindi sokuphikisana lamazwe angentshonalanga afana leBhilithani leMelika.
U Ayatollah Khamenei wethule amazwi la ekugqitshweni komhlangano we G-15 obuqhutshelwa kweleIran ngoMvulo. Lumhlangano ungenwe nguMongamneli Mugabe labakhokheli bamazwe asathuthukayo abathize abagoqela uHugo Chavez weleVenezuela loAbdoulaye Wade weleSenegal. U Ayatollah Khamenei wengeze wathi eleIran lizaqhubeka lisebenzelana leleZimbabwe.
Ekhuluma laye emhlanganwni lo, uMugabe usole amazwe angentshonalanga, ikakhulu iMelika leBhilithani esithi angabancindezeli. EleIran lilizwe elisolwa ngamazwe awentshonalanga ngombuso walo woncindezelo.
UMongameli Mahmoud Ahmadinejad wakulelo lizwe uke wethekelela eZimbabwe ngenyanga edluleyo, kunyathelo ingcwethi ezicubungula ezombusazwe ezithi liveza sobala ukuqina kobudlewano beZimbabwe leIran.
Eyinye yengcwethi lezi uMnu George Mkhwanazi - kungxoxo ayenze loNtungamil Nkomo weStudio 7 - usole kakhulu uAyatollah Khamenei ngokuncoma uMongameli Mugabe, esithi lokhu akumangalisi ngoba yena loMugabe bezimbila zantabanye.
