Inhlanganiso yeWorld Health Organisation (WHO) ithi kulabantu abedlula ikhulu - 116 abahlaselwe ngumkhuhlane wecholera, wona obulale abahlanu elizweni kusukela ngenyanga kaNcwabakazi njalo abahlanu babo babhubhe ngeviki edluleyo.
Inhlanganiso eziphathisa ngoncedo ezigoqela iUNICEF, Care International, Red Cross Society of Zimbabwe lezinye zithi zizilungiselele ukuphathisa uzulu uma umkhuhlane lo ungasabalala njenganyakenye, lapho ohlasele khona abantu phose inkulungwane ezilikhulu - 98 592 wabulala abedlula inkulungwane ezine - 4 288.
I UNICEF ithi izakupha uzulu ohlala ezigabeni ezihlaselwe ngumkhuhlane lo amaphilisi okuhlambulula amanzi, ukuze abantu bavikeleke ekuthatheni igcikwane lomkhuhlane lo.
Ababona ngezempilakahle bathi icholera ilakho ukumemetheka ngalesisikhathi, sokuna kwezulu. UMnu Nicholas Moyo, yena obona ngenhlelo zamanzi lezokuhlanzeka kuUNICEF uthi inhlanganiso yakhe ipha njalo uzulu amacebo okuzivikela emkhuhlaneni lo.
Udokotela Joshua Sibanda utshele uBrenda Moyo weStudio 7 ukuthi icholera ilula ukuyelapha, esithi abantu bengavele becabangele ukuthi sebelayo kumele bagijimele esibhedlela.
