amalinks wokungena

Breaking News

'Umnotho weZimbabwe Uzathuthuka Nge 7 % Lonyaka'


Ibhanga elikhulu lomhlaba ele World Bank lithi umnotho weZimbabwe uzathuthuka ukwedlula inotho yamazwe wonke angezansi yezwekazi leAfrica lonyaka.

Embikweni wayo ophume ngempelaviki edluleyo owe Global Economic Prospects Report for 2010, iWorld Bank ithi umnotho weZimbabwe uzakhula ngesilinganiso sokuyisikhombisa lanye ekhulwini, 7.1 % lonyaka.

Imbiko le isekela eyomphathintambo wezemali uMnumzana Tendai Biti ayethule ekupheleni komnyaka odluleyo. Ibhanga leli lithi isilinganiso lesi sizakwehla ngomnyaka ozayo umnotho ukhule ngesilinganiso sokuyisithupha lantathu ekhulwini, 6.3%.

Umnotho weSouth Africa, wona oqine ukwedlula inotho yamazwe wonke ezansi yeAfrica, ukhangelelwe ukuthuthuka ngesilinganiso sokubili kuphela ekhulwini lonyaka, 2 %.

Ingcwethi ecubungula ezenotho njalo ekhokhela inhlanganiso yeCoalition for Market and Liberal Solutions uMnumzana Rejoyce Ngwenya uthi kavumelani lembiko ye World Bank le.

UNgwenya uthi kuzakuba nzima ukuthi umnotho uqhele ngoba ilizwe libhekane lendlala enkulu kanti njalo amandla kagetsi ayasisela elizweni, okwenza kube nzima ukuthi amankampani athuthuke umnotho uqhele.

Kunjalo nje inhloko kahulumende uMnu Morgan Tsvangirai lomunye wabasekeli bakhe uMnu Arthur Mutambara, basuke elizweni ngoMvulo belubhekise kwele Switzerland ukuya phatheke emhlanganweni we World Economic Forum oqala ngolweSithathu.

Injongo yomhlangano lo ngeyokudinga amacebo okuthuthukisa inotho yamazwe omhlaba. UMongameli Robert Mugabe kasoze ephatheke emhlanganweni lo ngoba kanxuswanga.

‚Äč
XS
SM
MD
LG