Ibandla leZanu PF liqhubeka ngoMvulo lihlaselwe yikudonselana amandla okuqhamuke kwaba ludlakela edolobheni le Gwanda, eMutare lase Marondera lapho okulenkokheli okuthiwa kayisuke ezihlaweni.
UMnu. Andrew Langa nguye umgcinisihlalo webandla leli eMatabeleland South kuthi eMarondera yikho okulo Mnu. Ray Kaukonde ongumgcinisihlalo wesigaba se Mashonaland East. Ukutshengisela kweMarondera kuqale ngoMvulo ekuseni lapho okubikwa kugcwele abasekeli bebandla abavela endaweni ezitshiyeneyo zelizwe.
Amapholisa abikwa abegcwele edolobheni leli bekhangele abasekeli laba ngelihlo lokhozi kodwa akuqhamukanga dlakela. Edolobheni leMutare intsha ibikwa ibithe gwaqa emahofisini ebandla isithi ivikele abasekeli bebandla ababikwa besekela uMnu. Emmerson Mnangagwa abaze bevela eHarare.
Umumo ubikwa ubumubi edolobheni leli kulokufuthelana okukhulu. Lokhu kwenzakala nje kulembiko ethi uNkosikazi Mugabe ulakho ukwenza njalo eminye imihlangano lozulu kundawana ezitshiyeneyo zelizwe ngeviki ezayo.
Konke okwenzakala ebandleni leZanu PF kuqale ngemva kokuba uNkosikazi Mugabe ekhethwe ukukhokhela uhlangothi lwabesifazane bebandla leZanu PF. Isikhulumeli seZanu PF, uMnu. Rugare Gumbo utshele uChris Gande weStudio Seven ukuthi okwenzakalayo ebandleni leZanu PF kulakho ukuhlaziywa lidale elimqoka lebandla leli ngoLwesine.
Kunjalo nje, eGwanda kubikwa umumo ubulokhu umubi ntambama kulandela ukutshayana okubekhona ekuseni. Kubikwa kulenkokheli yebandla evela eHarare ebithunywe ukuzoxotsha uMnu. Langa kodwa abasekeli bakhe bathi akuqalwa lokho kwatshaywana kwaze kwalamula amapholisa. UChris Gande uphinde waxoxa lesakhamuzi seGwanda, uMnu. Albert Mazhale ukuze sizwe okwenzakeleyo.