Ugwalo olwalotshwa nguMnu. David Coltart, owayengumphathintambo wezemfundo ngesikhathi sikahulumende womanyano. selutheze olunye olulenkume esiluma ibandla leMDC-T.
Kugwalo lwakhe oluthiwa "The Struggle Continues: 50 Years of Tyrany in Zimbabwe", uColtart uthi ngomnyaka ka 2006 ibandla leMDC lingakadabuki phakathi lathumela abasakhulayo ukuyafundela ukuphatha izikhali kwele South Africa ngenhloso yokugenqula uhulumende weZimbabwe.
UColtart uthi ababefundisa abasekeli beMDC laba ngabake babangamasotsha eRhodesia kunye labake baba ngamapholisa eSouth Africa. Uthi lokhu ngokunye okwabangela ukuthi asuke kubandla leMDC-T lapho lidabuka phakathi.
Kodwa umsekeli wesikhulumeli sebandla leMDC-T unkosazana Thabitha Khumalo uthi lawo ngamanga ngoba nxa kuliqiniso wayekelelani ukutshela amapholisa ngesikhathi esizwa loludaba.
"Udaba lolu olukhulunywa ngu Coltart ngumbhedo. Sizatraina ama militia ukuthi kwenzakalani. Kwakusenzakalani khonapho? Engakhulumi into angayaziyo," kutsho uKhumalo.
UKhumalo uthi uColtart usehamba evula izilonda ezipholileyo ekhanya njengomuntu osefuna umsebenzi kubandla leZanu PF.
Wenezelele esithi ibandla leMDC-T lizakusa ugwalo lukaColtart kugatsha lwezomthetho ukuze bablucubungule babone ukuthi kungathathwa nyathelo bani.
