Ibandla leMDC-Renewal Team lithi selibumbe ikhomidi ezacubungula udaba lwelunga elisakhulayo, uMnu. Believe Tevera, othi wathathelwa umkakhe nguMnu. Elton Mangoma ongumgciningcebo webandla.
UMangoma wetheswa icala lokususa umka Tevera uNkosikazi Yemurai Maravanyika emzini wakhe watshiya usane olulomnyaka owodwa esiyahlala lapho abhadalaelwa imali ye rent nguMangoma.
UTevera uthe esiyapha inkokheli yebandla incwadi elezikhalazo zakhe ngoLwesibili watshaywa ngabantu abacatshangelwa ukuthi ngabasekeli baka Mangoma.
Kubikwa kufe amafasiteli ehosi lebandla kwalimala abanye ebudlwangudlwangwini lobu. Osekumangalise abanye bebandla yikuthi uMangoma, laye owatshaywa ngabasekeli beMDC-T walobela uMnu. Morgan Tsvangirai incwadi esola emsola ngokuba lamakhosikazi amanengi esithi kuzangcolisa igama lebandla.
Lesi yisikhathi uTsvangirai wayethwelenzima ngemva kokuvela kwemfihlo zakhe zekamelweni.
UTsvangirai wayetshade loNkosazana Locardia Kamatsenga Tembo masinyamasinya wathi kasamfuni kwezwakala ukuthi wayethandana lomunye njalo umama we South Africa uNosipho Shilubane ngelinye icele kulembiko ethi waba lomntwana lomunye unombazana oskahulayo wako Bulawayo.
UMangoma, laye othetheyo, waloba incwadi esithi konke lokhu kwakuzangcolisa igama lebandla. Imizamo yokukhuluma loMangoma yehlule.
UTevera utshele iStudio Seven ukuthi use loludaba kumgcinisihlalo webandla, uMnu. Sam Sipepa Nkomo.
Obona ngokuqoqa inhlelo zebandla, uMnu. Reggie Moyo utshele uChris Gande weStudio Seven ukuthi ikhomidi ebunjiweyo izacubungula loludaba nxa elecala uMangoma uzajeziswa.