Umthethwandaba waphezulu eGweru ugwebe uMnu. Farai Machaya, indodana ka Mnu. Jason Matshaya ongusibalukhulu we Gweru ukuhlala entolongweni okweminyaka elitshumi lasitshiyangalombili. UMachaya ugwetshwe ngemva kokufunyanwa elecala lokubulala umuyi uMnu. Moses Chokuda ngomnyaka ka 2009.
UMahluli uMnu. Nicholas Mathonsi uphinde wagweba ababotshwa lo Matshaya, oMnu. Abel Maphosa lezelamani uEdmore lo Bothwell Gana okweminyaka efanayo, kwathi abanye ababili, oMnu. Obert Gavi lo Tirivashoma Mawadze batholakala bengelacala lokubulala, ngakhoke bahle bakhululwa.
UMnu. Chokuda watshaywa waze wafa esetheswa icala lokuntshontsha evinkilini lika Machaya. Uyise utshele iStudio 7 ngoMvulo ukuthi kasoze asingcwabe isidumbu somntanakhe abadala lelicala bengakakhulumisani lemuli yakhe.
UMnu. Chokuda wayelilunga lecele le MDC elikhokhelwa nguMnu. Morgan Tsvangirai njalo ibandla leli lithi loludaba ngolwezombusazwe ngoba UMnu. Machaya labanye bakhe ngabasekeli bebandla le ZANU PF.
UMnu Effie Dlela Ncube, ingcwethi ecubungula ezombusazwe utshele uSithandekile Mhlanga we Studio 7 ukuthi ukugwetshwa kuka Machaya akumangalisi njalo akutsho ukuthi abalobudlelwano lebandla le ZANU PF bazatshona bejeziswa.