amalinks wokungena

Breaking News

UMnu Lovemore Moyo Ubuyela Esikhundleni Sokuba NguMlawuli wePhalamende


Obengumlawuli wedale lephalamende wasuswa ngumthethwandaba weSupreme Court kumaviki ambalwa edluleyo uMnu Lovemore Moyo ubuyelile esikhundleni sakhe ngemva kokunqoba uMnu Simon Khaya Moyo obemela iZanu PF kukhetho oluqhutshwe ngoLwesibili.

UMnu Lovemore Moyo, yena ongumgcinisihlalo weMDC ekhokhelwa nguMnu Morgan Tsvangirai, uthole amavoti alikhulu lanhlanu, 105, kwathi uMnu Simon Khaya Moyo wathola angamatshumi athobamunwe munye lantathu, 93.

Intathelizindaba yethu uMark Peter Nthambe ubika ukuba amanye amalunga eZanu PF adane kakhulu ngokunqotshwa kukaSimon Khaya Moyo, kwathi amanye ajabula ngoba ebengamfuni.

Kunjalo nje, icele leMDC elikhokhelwa nguMnu Tsvangirai lazise ngaphambilini kokhetho lolu ukuba amalunga eZanu PF agoqela uMnu Jonathan Moyo ake azama ukuthenga amalunga alo ewanikeza imali engange nkulungwane ezinhlanu zamadollar-US$5,000 ilunga ngalinye ukuba avotele uKhaya Moyo.

IMDC ithi amalunga ayo, ayithethe limali asekuvezake sobala. Ithi imali yonke enikwe amalunga ayo ifika kunkulungwane ezingamatshumi amabili lanhlanu-US$25,000. Asenelisanga ukuzwa kwabe Zanu PF ukuthi bathini ngalokhu.

XS
SM
MD
LG