UMnu. Lovemore Matombo okhokhela osokubonakala unjengelinye lamacele amabili enhlanganiso elwela amalungelo ezisebenzi eye Zimbabwe Congress of Trade Unions uthi icele lakhe liqoqa umhlangano walo omkhulu weCongress ngenyanga kaMpalakazi, njalo umhlangano osanda ukuqhutshwa licele elikhokhelwa nguMnu. George Nkiwane ko Bulawayo awukho emthethweni.
UMnu. Matombo utshele intathelizindaba ngolweSine ukuthi icele lakhe lizakuba lomhlangano ngempelaviki lapho elizabeka khona ilanga leCongress yalo.
Kodwa uMnu. Japhet Moyo, osanda ukukhethwa ukuba ngunobhala jikelele emhlanganweni wako Bulawayo, utshele iStudio 7 ukuthi icele lakhe leZCTU yilo elilandela umthetho njalo abakhokhelwa nguMatombo akufanelanga baqhube omunye umhlangano.