Amagqwetha amela umkhokheli wenhlanganiso yeInternational Socialist Organization, uMnu. Munyaradzi Gwisai labanye bakhe abahlanu acele umthethwandaba weHarare ukuthi ube lesineke lapho usethulela izibotshwa lezi isigwebo, esikhangelelwe ngolweSithathu.
Omunye walamagqwetha uMnu. Alec Muchadehama, utshele umthethwandaba ukuthi abayisithupha laba bahlukuluzwe kakhulu ezandleni zamapholisa lapho bevalelwe phose inyanga yonke besalelwa loba ukuhlawula imali yesibambiso eyebail ukuze bathoniswe bevela emakhaya.
Kodwa umthethwandaba uthi akulabufakazi obuqinileyo obukhomba lokhu.
UMuchadehama uphinde wathi kungcono abayisithupha laba behlawuliswe imali yefayindi kulokuthi bapike ejele.
Abayisithupha laba babotshwe ekuqaleni komnyaka odluleyo besetheswa icala lokufuna ukugenqula uhulumende kodwa lelicala laseliguqulwa laba ngelokutshotshezela udlakela. Bafunyanwe belecala ngolweSibili..
Batholakala bebukela imfanekiso kumabonakude eyokutshengisela komvukela wakwele Egypt.
UMnu. Matshobana Ncube, ingcwethi kwezemithetho, usinika ingcazelo yokwenzakale emthethwandaba lamuhla kungxoxo ayiqhube loSithandekile Mhlanga weStudio7.
