amalinks wokungena

Breaking News

Inengi Licatshulwa Yisigwebo Esetheswe UMnu. Munyaradzi Gwisai Labanye Bakhe


Umthethwandaba kamantshi eHarare ugwebele uMnu. Munyaradzi Gwisai, umkhokheli wenhlanganiso ye International Socialist Organization labanye bakhe abahlanu ukuthi besebenze i Community Service njalo bebhadale ifayini.

Umthethwandaba kamantshi eHarare ugwebele uMnu. Munyaradzi Gwisai, umkhokheli wenhlanganiso ye International Socialist Organization labanye bakhe abahlanu ukuthi besebenze i Community Service njalo bebhadale ifayini.

Umahluli uMnu. Kudakwashe Jarabini uthe ifayini le ngamadola angamakhulu amahlanu umuntu ngamunye, njalo bazasebenza okwamahola edlula amakhulu amane ku Community Service.

UJarabini wengezelele wathi abahlanu laba bazapika ejele phose okomnyaka owodwa nxa bengalandelanga lesisigwebo, baphinde bapike emibili bengadala icala elifanayo phakathi kweminyaka emihlanu elandelayo.

Uthe umthethwandaba awuthandanga ukuthi abayisithupha laba pepike ngoba uMnu. Gwisai ulomlandu wokuqhubeka efundisa ekolitshini, kukanti omunye wakhe, uNkosazana Antoinette Choto ulesifo senhliziyo. Abanye njalo balomlandu wokunakekela abantwana abancinyane.

Igqwetha elimela abathathu laba, uMnu. Alec Muchadehama uthi uzaphikisa lesisigwebo.

Abayisithupha laba babotshwe ekuqaleni komnyaka odluleyo besetheswa icala lokufuna ukugenqula uhulumende kodwa lelicala laseliguqulwa laba ngelokutshotshezela udlakela.

Umkhokheli welinye lamacele eMDC njalo eyinhloko kahulumende uMnu. Morgan Tsvangirai usole umthethwandaba ngokufumana abayisithupha laba belecala kuthange.

UNkosazana Thabitha Khumalo, umsekeli wesikhulumi salelibandla utshele uSithandekile Mhlanga weStudio 7 ukuthi okwenzakale emthethwandaba kuzakuba yisibonelo esibi sokwephulwa kwelungelo loluntu.

Silokhu sikudaba lunye, inhlanganiso ezilwela ilungelo loluntu eZimbabwe zithi kazamukeli isigwebo esethulelwe uMnu. Munyaradzi gwisai labanye bakhe abahlanu. Inkokheli zalezi nhlanganiso zikhuthaza uzulu weZimbabwe ukuthi asukumele phezulu amanyane labo emizameni yokulwela ilungelo loluntu kanye lokulandelwa kwemithetho. UMavis Gama usethulela lolu daba ngokugcweleyo eseHarare.

XS
SM
MD
LG