Unobhala jikelele wecele leMDC elikhokhelwa nguMnu. Morgan Tsvangirai, uMnu Tendai Biti uthi ibandla leZanu PF selithumele amasotsha emaphandleni elizweni jikelele ukuya kwethusela uzulu phambilini kokhetho. UBiti utshele umhlangano owenzelwe eKuwadzana edolobheni leHarare ngeSonto ukuthi ibandla leZanu PF selileminyaka emibili lingacithanga igazi
okokuthi sekumele abasekeli bebandla lakhe balimuke.
NgoLweSihlanu olwedluelyo ngokwakhe utshele intathelizindaba eHarare ukuthi amasotsha athunyezwe emaphandleni kumele abuyiselwe enkambeni zawo.
Umphathintambo wezomvikela uMnu. Emmerson Mnangagwa uphume ephephandabeni le The Herald kunsukwana ezisanda kwedlula elandula imbiko ethi kulamasotsha asiwe emaphandleni.
UChris Gande weStudio 7 uxoxe lolwela ilungelo likazulu, uMnu Peter Muchengeti othi mpela amasotsha asekhona endaweni ezitshiyeneyo zelizwe lanxa engakaqali ukuhlukuluza uzulu.
