amalinks wokungena

Breaking News

UMnu Tsvangirai Ulamula Amacele Ebandla Lakhe KoBulawayo


Inhloko kahulumende uMnu Morgan Tsvangirai ubekoBulawayo ngoMvulo ukuyalamula ingxabano ekhona phakathi kwamacele ebandla lakhe amabili adonselanayo ngaphambilini komhlangano wabo omkhulu oweNational Congress ngoLwesithathu.

UTsvangirai uhlangane lecele elikhokhelwa nguMnu Matson Hlalo lelikhokhelwa nguMnu Gorden Moyo walaya ukuba ukulwisana phakathi kwamacele la kumele kuphele.

Ulaye njalo ukuba uHlalo kumele ahloniphe uMoyo njengomgcinisihlalo walelibandla koBulawayo okhethwe ngemfanelo kumaviki ambalwa asanda kwedlula. UHlalo unqotshwe kulolukhetho wasesala ukwamukela impumela esithi abanye babasekeli bakhe balisiwe ukuvota.

Ekhuluma leStudio 7 ngomvulo uHlalo uthe uyasihlonipha isinqumo sikaTsvangirai lanxa nje elokhu ebuhlungu.

Kube lodlakela olukhulu phakathi kwamacele womabili kunsukwana ezedluleyo olubangele ukuba ukhetho lumiswe ezinye izikhundla zingakagcwaliswa. UMnu Tsvangirai uthe kasoze aluvumele loludlakela lubhidliza ibandla lakhe.

Uthe izikhundla ezisele zingakagcwaliswa, zizagcwaliswa ngoLwesibili kuliviki ekhethweni lokucina lwalelibandla olwamaProvince.

Uqhubeke esithi usewatholile wonke amabizo alabo abavuse umsindo wathi bazajeziswa emhlanganweni omkhulu weCongress. Isikhulumi salelibandla, uMnu Nelson Chamisa, uthe uTsvangirai usekuqede du ukudonselana obusuyinsakavukela umchilo wesidwaba kulelibandla koBulawayo.

XS
SM
MD
LG