UMongameli weIran, uMnu Mahmoud Ahmadinejad ufike eZimbabwe ngoLwesine elanda ukuzevula okusemthethweni umbukiso walonyaka weZimbabwe International Trade Fair ngemva kokuba enxuswe nguMongameli Robert Mugabe.
UAhmadinejad uhlangabezwe nguMugabe leziphathamandla zebandla lakhe leZanu PF egcekeni lendizamtshina eHarare njalo ukhangelelwe ukuvula okusemthethweni iZITF ngoLwesihlanu koBulawayo.
Inhloko kahulumende uMnu Morgan Tsvangirai ubikwa engasoze abambane loMugabe kanye loMnu Ahmadinejad ngoLwesihlanu. Iziphathamandla zebandla lakhe zibikwa lazo zingasoze zibe khona eTrade Fair ngesikhathi sokuvulwa kwayo nguAhmadinejad.
Asenelisanga ukuzwa ukuthi abecele leMDC elikhokhelwa nguMnu Arthur Mutambara bazaphatheka na. Icele lika Tsvangirai lona lethule umbiko lisola uMugabe ngokunxusa uAhmadinejad, lisithi ungumkhokheli olihlazo ongamelanga ethekelele elezimbabwe.
Lithi njalo ukuza kukaAhmadinejad eZimbabwe kuzaphazamisa kakhulu imizamo yokuvuselela ubudlelwano beZimbabwe lamazwe angentshonalanga, wona asola umbuso weTerhan.
UAhmadinejad ubikwa ezalobelana phansi izivumelwano loMugabe ezijonge ukuqinisa ubudlelwano kwezamabhizimusi phakathi kwamazwe womabili. Ukuhlaziya udaba lolu uNtungamili Nkomo weStudio 7 uxhume ingcwethi ecubungula ezombusazwe uMnu George Mkhwanazi.
