UMongameli Robert Mugabe usesole inkokheli enconywa yinkokheli zamazwe entshonalanga esithi lokhu yikubenza ukuthi behlamukele abanye babo.
Amazwi kaMugabe la, akhanya sobala ukuthi ubekhuluma ngenhloko kahulumende, uMnu. Morgan Tsvangirai, lanxa engambethanga ngegama ngoba nguye onconywe yinhloko kahulumende wakwele Australia uNkosikazi Julia Gillard.
UGillard uthi isimo sikaTsvangirai sifana xathu lesika Mnu.Nelson Mandela owake wakhokhela ele South Africa.
UMugabe ephawula isikhwama se Marange – Zimunya Ownership Trust ngolweSine uthe bakhona abazenza abaletha ububelo elizweni bona bengela ngitsho lenxeba elilodwa lwempi kazibuse.
Uphinde wacothoza abasola uhlelo lokwabela abensundu inotho wathi lasebahla emazweni kumele baphenduke elizweni bazothola labo izithelo zohlelo lweIndigenization.
UMnu. Tsvangirai, okhangelelwe ukuphenduka elizweni ngoMgqibelo, ubephakathi kohambo lokucela amazwe entshonalanga ukuthi ekethise izijeziso zenotho ezafakelwa uMugabe labanye bakhe abaku Zanu PF.
Ingcwethi ecubungula ezombusazwe, uMnu. Nkululeko Sibanda utshele uChris Gande weStudio 7 ukuthi amazwi kaMugabe ayamangalisa ngoba kawatshengisi ubunono lokukhalipha komuntu osebuse ilizwe okweminyaka eminengi.