Umongameli Robert Mugabe segcizelele isifiso sakhe sokuthi kuvuselelwe ubudlelwano phakathi kweZimbabwe lamazwe angentshonalanga afana leMelika kanye leBhilithani.
Ekhuluma leReuters ngoLwesine, uMugabe uthe kuyamdanisa ukuthi amazwe la akhanya eqhubeka engafuni ukudlelana kuhle leZimbabwe.
Njengenhlalayenza, uMugabe usole izijeziso ezafakelwa iZimbabwe ngamazwe angentshonalanga esithi zifana lokuthunjwa kwelizwe leIraq okwenziwe ngamabutho eBhilithani laweMelika eminyakeni edluleyo.
Ephatha udaba lokubuyiselwa kwenotho ezandleni zabensundu, uMugabe uthe uhulumende kasoze abuyele muva ngomthetho weIndeginization and Economic Empowerment Act.
Ebuzwa ngemibiko yokuthi kaphilanga kuhle, uMugabe uphendule wathi ingamanga leyombiko, esithi uqine saka.
Ukuhlaziya amazwi kaMugabe, ikakhulu udaba lobudlelwano beZimbabwe lamazwe angentshonalanga, uNtungamili Nkomo weStudio 7 uxhume ingcwethi ecubungula ezombusazwe uMnumzana Mandlenkosi Gatsheni.
Edabeni lunye uBrenda Moyo weStudio 7 uxhume ezinye njalo ingcwethi ezicubungula ezombusazwe, uMnumzana Effie Dlela Ncube loMnumzana Philani Moyo.
UBrenda uqale ngokuphosela bobabili umbuzo wokuthi kambe uMugabe uqinisile na nxa esithi ufuna eleZimbabwe livuselele ubudlelwano lamazwe angentshonalanga, lokuthi kambe wona amazwela emukela njani amazwi akhe la.
