Umongameli Robert Mugabe usekhuthaze amazwe akumanyano we United Nations emhlanganweni wabatsha e New York khonapha eMelika ukuthi athathe isibonelo esihle senhlelo eziqhutshwa eZimbabwe ezithuthukisa abatsha ezigoqela uhlelo lweIndigenization, idale labatsha, kanye lezemfundo.
UMugabe uthe inhlelo lezi zithuthukisa abatsha ngoba sebelamabhizimusi njalo besenelisa ukuphatheka ekuthuthukiseni umnotho welizwe.
Ungezelele wathi kufanele umanyano wamazwe omhlaba owe United Nations ubumbe inhlanganiso yabatsha ezalwisana lomkhuhlane we ngculaza.
UMnu. Abraham Mathetha, ilunga le nhlanganiso yogatsha lukahulumende olwabatsha eye Zimbabwe Youth Council okulo umhlangano utshele iStudio 7 ukuthi kuliqiniso ukuthi kulenhlelo ezithuthukisa abatsha njalo kusese lomango omude ukuthi ziphumelele ngokupheleleyo.
Silokhu sikudaba olufanayo, uMnu. Promise Mkhwananzi, isiphathamandla sogatsha lwabatsha ekucele le MDC elikhokhelwa nguMnu. Morgan Tsvangirai utshele uSithandekile Mhlanga we Studio 7 ukuthi inhlelo zokuthuthukisa abatsha ziqondiswa kumalunga eZANU PF kuphela, inengi lawo elihlezi lihlukuluza abantu.