UMongameli Jacob Zuma weleSouth Africa ufike eHarare ngoLwesibili ukuyakhulumisana labakhokheli bamabandla akuhulumende womanyano ngokudonselana okukhona kuhulumende lo.
U Zuma uzahlangana loMongameli Mugabe, inhloko kahulumende uMnu Morgan Tsvangirai loMnu Arthur Mutambara ngoLwesithathu behlaziya ingxabano ekhona phezu kokungafezwa kwesivumelwano seGlobal Political Agreement.
Efika eHarare International Airport, uZuma uhlangabezwe nguMugabe, uMutambara loTsvangirai ngehola lesithupha.
Abasekeli beZanu PF labo babuthene eHarare International Airport bahlabela ingoma bechothoza uTsvangirai besithi nguye owanxusa amazwe angentshonalanga ukuthi afakele uMugabe labanye bakhe izijeziso.
Uhambo lukaZuma luza ngemva kokuba ethumele iqula lakhe eHarare ngoMvulo ukuyakhulumisana labamela amacele womabili eMDC leZanu PF kunkulumo, ngaphambilini kokuhlangana kwakhe loMugabe, uTsvangirai loMutambara ngoLwesithathu.
Abazi ngokwenzakalayo bathi akula lutho oluphume kunkulumo lezi. Umqondisi weHabbakkuk Trust uMnu Dumisani Nkomo utshele uNtugamili Nkomo weStudio 7 ukuthi afiphele amathuba okuthi uZuma aphumelele kuhambo lwakhe lolu.
