UMongameli weSouth Africa, uMnu Jacob Zuma uthi ulokujabula okukhulu ngokuqala kwenkulumo phakathi kweMDC leZanu PF emizameni yokulungisisa okuhluphayo kuhulumende womanyano.
Inkulumo lezi ziqale ngoMvulo eHarare njalo ziyaqhubeka. Omunye wabacebisi bakaZuma uNkosazana Lindile Zulu utshele umsakazo lo ukuthi uMnu Zuma ukhangelele ukuthi okuhluphayo phakathi kweZanu PF leMDC kulungisiswe ngokuphangisa.
UZuma ubemele aye eZimbabwe ngolweSihlanu olwedluleyo njengokulaya kweSadc Troika, kodwa kasayanga ngoba inkulumo phakathi kwamabandla la bezingakaqalisi.
Umanyano weAfrican Union wona ubikwa ulakho ukuthumela isikhonzi eHarare ukuyabona ukuthi kahle-kahle kuyini okwenzakalayo kuhulumende womanyano lo, kanye lokuthi okuhluphayo kungalungisiswa njani.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi luzaqhubeka luhlupha udaba lweZimbabwe nxa iSadc ingangenelanga ngamanadla.
