Iqula likaMongameli Jacob Zuma weleSouth Africa lifike eHarare ngoLwesithathu ukuyabhula umlilo phakathi kweZanu PF leMDC kulandela ukufuthelana okuqhele kwafika ezingeni elibi kuhulumende womanyano ngeviki edluleyo.
Abakuqula leli babalisa umcebisi kaMnu Zuma, uNkosazana Lindiwe Zulu, uMnu Mac Maharaj loMnu Charles Ngqakula.
Abathathu laba bazahlangana loMongameli Mugabe, inhloko kahulumende uMnu Morgan Tsvangirai lomsekeli wakhe uMnu Arthur Mutambara.
Ukufuthelana kuhulumende womanyano kuze ngemva kokuba uMugabe ebuyisele osibalukhulu bezabelo abebandla lakhe leZanu PF ezikhundleni zabo engavumelananga labeMDC.
Inyathelo leli licunule amacele womabili eMDC, uMnu Tsvangirai lecele lakhe basebethatha inyathelo loluthi kabasoze bebe besananza zonke iziphathamandla abakhethwe ngudlu nguMugabe.
Iziphathamandla lezi zigoqela usibalukhulu webhanga elikhulu uMnu Gideon Gono, igqwetha likahulumende uMnu Johannes Tomana, abahluli bedale leHigh Court labameli beZimbabwe emazweni abalisa eleSouth Africa, Sweden, Switzerland le Italy.
UMnu Tsvangirai ulobele abamazwe la, abeUnited Nations, labe European Union ngoMvulo esithi bengananzi abameli beZimbabwe abathunyelwe nguMugabe ngoba bekhethwe ngaphandle komthetho.
I EU yona yethule umbiko ngoLwesitathu isithi udaba lolu ludaba oluyikhathazayo kakhulu njalo ithi eleZimbabwe kuzamele lichasise sobala ukuthi kuyini kahle-kahle okwenzakalayo ngabameli balo.
UMongameli Zuma yena sokukade ezama ukuyilungisisa inkinga yeZimbabwe kodwa engaphumeleleli. Ukuhlaziya loludaba sixhume ingcwethi ecubungula ezombusazwe uMnu Mandlenkosi Gatsheni.
