amalinks wokungena

Breaking News

UMongameli Jacob Zuma Ubikwa Ezangenela Kudaba LukaBennett


Iqula likaMongameli Jacob Zuma weleSouth Africa lithi lizakhulumisana lamabandla akuhulumende womanyano, ikakhulu eleZanu PF ngodaba lukaMnu Roy Bennett kulandela inyathelo eselithethwe ngumtshutshisi omkhulu kahulumende lokuphikisa ukwesulwa kwecala likaBennett.

Iwofisi kaMnu Johannes Tomana igqwetha elikhulu likahulumende, yazise ngoLwesithathu ukuthi izaphikisa ukutholakala kukaMnu Bennett ngumthethwandaba weHigh Court ngoMvulo engelacala lokuzama ukugenqula uhulumende kaMongameli Robert Mugabe.

UMongameli Zuma yena utshele idale lakhe lephalamende ngoLwesithathu ukuthi ukwesulwa kwecala likaBennett kuzancedisa ekuthini kuqedwe ukudonselana okukhona phakathi kweZanu PF leMDC.

Kodwa amazwi la uwethule engakezwa ngondaba lokuthi uhulumende weZimbabwe uthe uzaphikisa isinqumo lesi.

Inhloko kahulumende njalo ekhokhela elinye lamacele eMDC uMnu Morgan Tsvangirai yena, utshele iStudio 7 ngoMvulo ukuthi uMnu Bennett sezaqalisa umsebenzi njengomsekeli kamphathintambo wezokulima njengoba setholakale emsulwa.

Kodwa abeZanu PF bathi uBennett kabafuni afungiswe athathe isikhundla lesi, yikho nje sebebuyela emthethwandaba. UMnu Tsvangirai uzahlangana loMugabe kunsukwana ezizayo bekhulumisana ngodaba kulaBennett lolu.

Icele leMDC elikhokhelwa nguMnu Arthur Mutambara lalo libikwa lingathokozi ngokuphikiswa kwesinqumo sokwesulwa kwecala likaBennett nguTomana. Udaba lukaBennett ngolunye lwezinto ezilokhu zihlupha phansi kwesivumelwano seGlobal Political Agreement.

Ilunga lequla likaMongameli Zuma eliphakathi kwemizamo yokuqeda ukudonselana okukhona phakathi kweZanu PF leMDC, uNkosazana Lindiwe Zulu uthi bakhangelele ukukhulumisana leZanu PF ngodaba lolu kunsukwana ezizayo.

‚Äč
XS
SM
MD
LG