Umphathintambo obona ngokwethulwa kwemibiko njalo eyisiphathamandla sebandla le ZANU PF, uMnu. Webster Shamu uthi uhulumende uzathathela amaphephandaba lemisakazo ezimeleyo amalayisensi okuqhuba imisebenzi yawo ngoba esethula imbiko yokweyisa uMongameli Robert Mugabe.
Ekhuluma lamalunga ebandla lakhe ngempelaviki, uMnu. Shamu ubikwa ethe intathelizindaba zihlezi zichothoza uMugabe, imuli yakhe, kanye leziphathamandla ze ZANU PF ngembiko esobala ukuthi ayisiqiniso.
Wengeze wathi imisakazo ilemvumo yokuchothoza kodwa akumelanga isebenzise ithuba leli ukuthathela ibandla le ZANU PF usekelo ngokuchothoza iziphathamandla zalelibandla mahlayana.
Kodwa uMnu. Raphael Khumalo, isiphathamandla senkampani ye Alpha Media Holdings ebhala amaphephandaba e The Standard, The Zimbabwe Independent, le Newsday utshele uSithandekile Mhlanga we Studio 7 ukuthi uMnu. Shamu ubefuna ukuthabisa amalunga ebandla lakhe kuphela, njalo kufanele aqoqe umhlangano lenkampani yakhe nxa kukhona okuhluphayo.