Umsakazo weZimbabwe Broadcasting Cooperation suzaqala ukwethula inhlelo lezindaba zeChina kulandela ukuvumelana phakathi kwalumsakazo lequla laseChina ebeliselizweni kuliviki.
Indaba lezi zizavela emsakazweni weChinese Central Television (CCTV), wona ozakwethula njalo izindaba zeZimbabwe uzithatha kumsakazo weZBC.
Okwamanje inhlelo zeCCTV zitholakala kuma Free to Air Decoders afana leWhiztek. Kodwa inengi lithi alizijabuleli lezinhlelo.
Umbalisi wezifundo eziphathelane lokwethulwa kwezindaba eNational University of Science and Technology uMnu Zenzele Ndebele uthe akukho okumqoka uzulu azakuthola kundaba zeChina.
Kunjalo nje, ibhanga leChina Development Bank Corporation seliphe isikhwama esikweledisa abamabhizimusi asathuthukayo eZimbabwe izigidi ezingamatshumi amathathu zamadollar - $30million.
Umphathintambo wezamabhizimusi amancane uNkosikazi Sithembiso Nyoni uthe isikhwama semali le sizabanjwa yiInfrastructure Development Bank.
Ingcwethi kwezenotho uMnu Rejoice Ngwenya uthe okuhluphayo yikuthi imali edingwa kwele China ivame ukuphiwa abalandeli bebandla leZanu PF.