Umsekeli wenhloko kahulumende uNkosazana Thokozani Khuphe wamukele isicoco somvuzo weAfrican Achievers Award, ngenxa yemisebenzi yakhe yokuthuthukisa abesifazana eZimbabwe kanye lasezwekazi le Africa.
Isicoco lesi sike semukelwa nguArchbishop Desmond Tutu weSouth Africa, njalo uMaKhuphe unqobe umsekeli kamongameli weMalawi, uNkosikazi Joyce Banda lezinye iziphathamandla ze Africa ukuze asithole.
Abaqoqi balesisicoco bathi uMaKhuphe, yena oyisiphathamandla secele le MDC elikhokhelwa nguMnu. Morgan Tsvangirai bamkhethele imisebenzi yakhe emihle egoqela ukukhankasela ukuthuthukiswa kwabesifazana kwezombusazwe kanye lezempilakahle.
IStudio 7 ayeneslisanga ukukhuluma loMaKhuphe ngoba ebephakathi kokwamukela lesisicoco singakayi emoyeni.
UMnu. Abednico Bhebhe, umsekeli kamqoqi wenhlelo zecele zalelibandla utshele uSithandekile Mhlanga weStudio 7 ukuthi ibandla lakhe liyaziqhenya ngemisebenzi kaMaKhuphe.