Iziphathamandla zenhlanganiso yezisebenzi, eyeZimbabwe Congress of Trade Unions ezibotshwe ngeSonto eVictoria Falls zikhululwe ngumthethwandaba kamantshi ngoLwesine, wona onqume ukuthi akula cala elazidalayo. Umkhokheli walinhlanganiso, uMnu Lovemore Matombo ubebotshwe ndawonye loMnu Percy Mcijo, uMnu Dumisani Ncube, uMnu Nhawu Ndlovu loMnu Michael Kandukuta besetheswa icala lokwenza umhlangano bengacelanga imvumo emapholiseni. Abahlanu laba bebelokhu bevalelwe kusukela ngeSonto njalo babotswe phansi komthetho wePublic Order and Security Act (POSA). Kodwa umantshi obehluza udaba lwabo, uMnu Richard Ramaboea ubakhulule esithi vele akudingakali ukuthi abenhlanganiso zezisebenzi bacele imvumo emapholiseni nxa besenza imihlangano yabo. Igqwetha ebelimela uMatombo labanye bakhe emthethwandaba, uMnu Kucaca Phulu usole amapholisa kungxoxo ayenze loNtungamili Nkomo weStudio 7 esithi injongo yawo bekuyikuhlukuluza nje abeZCTU laba.
