Umthethwandaba ophezulu eHarare usunqume ukuthi okhansila abane balelidolobho abaxotshwa emsebenzini ngumphathintambo wezabelo uMnu. Ignatious Chombo ngomnyaka odluleyo babuyiselwe ezikhundleni zabo ngoba bengelacala.
Abane laba babalisa okhansila Paul Gorekore, Johnson Zaranyika, Maxwell Katsande, lo Silas Machete abamela amawadi aseMbare, Dzivarasekwa, le Tafara.
Kuviki edluleyo, umthethwandaba kamantshi ufumane okhansila balelidolobho, oMnu. Warship Dumba lo Casper Takura abamela i Mount Pleasant le Tafara bengelacala ngemva kokudonselwa emthethwandaba nguMnu. Chombo esithi abathembeki.
Lokhu kwenzakala idale lephalamende liphakathi kokuhlafuna ukuguqula umthetho wezabelo owe Urban Councils Act ongonciphisa amandla kamphathintambo walolugatsha.
Inhlanganiso ye Harare Residents Association yethule umbiko othi iyasithakazelela isinqumo somthethwandaba ophezulu ngoba indawo lezi ezazingamelwanga sezizathola abameli zithuthuke.
UKhansila Peter Moyo we Norton kulelidolobho utshele uSithandekile Mhlanga we Studio 7 ukuthi ibandla lakhe liyemukela izinqumo somthethwandaba ophezulu ngoba kusobala ukuthi amakhansila la awalacala kukanti lomsebenzi wekhansili ubusubuyela emuva ngoba bengekho.